നീണ്ട ഇടവേളക്ക് ശേഷം ഒരു യമണ്ടൻ പ്രേമകഥയുമായി ദുല്‍ഖര്‍ വരുന്നു

നീണ്ട ഇടവേളക്ക് ശേഷം ദുൽഖർ സൽമാൻ മലയാളത്തിലേക്ക് തിരിച്ചുവരുന്നു. ഒരു യമണ്ടൻ പ്രേമകഥ എന്ന ചിത്രത്തിലൂടെയാകും ദുൽഖറിന്റെ വമ്പൻ തിരിച്ചുവരവ്. സിനിമയുടെ ചിത്രീകരണം അടുത്ത മാസം തുടങ്ങുമെന്ന് താരം അറിയിച്ചു.

കഴിഞ്ഞ വർഷം ഡിസംബറിൽ പ്രഖ്യാപിച്ച ചിത്രമാണ് ഒരു യമണ്ടൻ പ്രേമകഥ. എന്നാൽ ആറ് മാസം പിന്നിട്ടിട്ടും സിനിമയുടെ ചിത്രീകരണം ആരംഭിക്കാത്തതിന്റെ നിരാശയിലായിരുന്നു കുഞ്ഞിക്കയുടെ ആരാധകർ. ഇതിനിടെ ഒരു ഹിന്ദി ചിത്രത്തിലും ഒരു തെലുഗു ചിത്രത്തിലും രണ്ട് തമിഴ് ചിത്രങ്ങളിലും ദുൽഖർ അഭിനയിച്ചു. ഈ വർഷം ദുൽഖറിന്റെ മലയാള ചിത്രം തീയറ്ററിലുണ്ടാകില്ലേ എന്ന് ദുഃഖിച്ചവർക്ക് ആശ്വാസമായാണ് ഈ വാർത്ത. ജൂലൈ 3നാണ് സിനിമയുടെ ചിത്രീകരണം ആരംഭിക്കുക. ഫോർട്ട് കൊച്ചിയും മട്ടാഞ്ചേരിയും ആയിരിക്കും പ്രധാന ലൊക്കേഷനുകൾ.

അമർ അക്ബർ അന്തോണി, കട്ടപ്പനയിലെ ഋത്വിക് റോഷൻ എന്നീ ചിത്രങ്ങളുടെ തിരക്കഥാകൃത്തുക്കളായ വിഷ്ണു ഉണ്ണികൃഷ്ണൻ, ബിബിൻ ജോർജ് എന്നിവർ ചേർന്നാണ് ഈ കോമഡി ചിത്രത്തിന് തിരക്കഥ എഴുതുന്നത്. ദുൽഖറിനൊപ്പം സലീം കുമാർ, ധർമജൻ ബോൾഗാട്ടി, രമേശ് പിഷാരടി, തിരക്കഥാകൃത്തുക്കളായ വിഷ്ണു ഉണ്ണികൃഷ്ണൻ, ബിബിൻ ജോർജ് എന്നിവരും അഭിനയിക്കുന്നുണ്ട്. സുജിത് വാസുദേവ് ആണ് ഛായാഗ്രാഹകൻ. നാദിർഷ ചിത്രത്തിലെ ഗാനങ്ങൾക്ക് സംഗീതമൊരുക്കും. കട്ടപ്പനയിലെ ഋത്വിക് റോഷൻ, പുലി മുരുകൻ എന്നീ ചിത്രങ്ങളുടെ എഡിറ്റർ ജോൺ കുട്ടിയാകും ഒരു യമണ്ടൻ പ്രേമകഥയുടെയും ചിത്രസംയോജകൻ. ക്രിസ്തുമസിന് തിയ്യേറ്ററിലെത്തുമെന്ന് അറിയിച്ചു.